ບອກແລ້ວບໍ່ຟັງ…!!! ສຶກສາອົບຮົມ ແລະ ປິດຮ້ານກິນດື່ມຊາວຫວຽດນາມ 3 ຮ້ານ ຍ້ອນບໍ່ປະຕິບັດຄຳສັ່ງ

ບອກແລ້ວບໍ່ຟັງ…!!! ສຶກສາອົບຮົມ ແລະ ປິດຮ້ານກິນດື່ມຊາວຫວຽດນາມ 3 ຮ້ານ ຍ້ອນບໍ່ປະຕິບັດຄຳສັ່ງ

ພະແນກຕຳຫຼວດຕ້ານການຄ້າມະນຸດ ນະຄອນຫຼວງວຽງຈັນ ໄດ້ຈັດຕັ້ງປະຕິບັດຕາມທິດຊີ້ນຳຂອງກອງບັນຊາການ ປກສ ນະຄອນຫຼວງວຽງຈັນ ແລະ ຂໍ້ຕົກລົງ ເລກທີ 120/ຫຕຫຼ ລົງວັນທີ 20 ເມສາ 2021 ວ່າດ້ວຍການແຕ່ງຕັ້ງນາຍ ແລະ ພົນຕຳຫຼວດລົງແກ້ໄຂບັນດາຮ້ານອາຫານ, ຮ້ານກີນດື່ມ ໃນເວລາ 22 ໂມງ 00 ນາທີ ຂອງ ວັນທີ 20 ເມສາ 2021 ນຳພາໂດຍ ພັຕ ສີນໄຊ ລັດຕະນະພັນ ພ້ອມດ້ວຍຄະນະໄດ້ສົມທົບກັບ ປກສ ບ້ານຄຳຮຸ່ງ ເມືອງໄຊທານີ ນະຄອນຫຼວງວຽງຈັນ

ລົງກວດກາເຮັດບົດບັນທຶກສຶກສາອົບຮົມເຈົ້າຂອງຮ້ານກີນດື່ມຊາວຫວຽດນາມ ຈຳນວນ 3 ຮ້ານ ທີ່ບໍ່ປະຕິບັດຕາມຄຳສັ່ງຂອງ ນາຍົກລັດຖະມົນຕີ ແຫ່ງ ສປປ ລາວ ທີ່ຍັງເປີດບໍລິການທາງເພດ ມີສາວບໍລິການ 9 ຄົນ.

ພັຕ ສີນໄຊ ລັດຕະນະພັນ ໃຫ້ຮູ້ຕື່ມວ່າ: ໃນຈຳນວນສາມຮ້ານແມ່ນເປັນຮ້ານກີນດື່ມຂອງຊາວຫວຽດນາມທີ່ມາເຊົ່າສະຖານທີ່ເປີດຮ້ານກີນດື່ມ ບໍລິການ ຢູ່ບ້ານຄຳຮຸ່ງ ເມືອງໄຊທານີ ນະຄອນຫຼວງວຽງຈັນ ທີ່ມີສາວບໍລິການລວມ 9 ຄົນ ມີຄົນລາວ ສັນຊາດລາວ 2 ຄົນ ແລະ ສັນຊາດຫວຽດນາມ 7 ຄົນ ບໍ່ປະຕິບັດຕາມຄຳສັ່ງຂອງ ທ່ານ ນາຍົກລັດຖະມົນຕີ ຈຶ່ງໄດ້ເຮັດບົດບັນທຶກ ໃຫ້ປິດຮ້ານທັງໝົດສາມຮ້ານ ສ່ວນສາວບໍລິການ ລວມທັງ 9 ຄົນ ສຶກສາອົບຮົມໃຫ້ຢຸດເຊົາກັບບ້ານຂອງຕົນ ເພື່ອໄປປະກອບອາຊີບໃໝ່ທີ່ຖືກຕ້ອງຕະລະບຽບກົດໝາຍ.

ກອງບັນຊາການ ປກສ ນະຄອນຫຼວງວຽງຈັນ ຮຽກຮ້ອງມາຍັງເຈົ້າຂອງກິດຈະການ, ຫົວໜ່ວຍທຸລະກິດຕ່າງໆ ໃຫ້ປິດສະຖານທີ່ໃຫ້ບໍລິການຂອງຕົນ ເພື່ອປ້ອງກັນບໍ່ໃຫ້ພະຍາດໂຄວິດ-19 ມີການແຜ່ລະບາດເພິ່ມຂຶ້ນ, ຕໍ່ກັບຜູ້ລະເມີດຖ້າກວດພົບແມ່ນໃຫ້ເຮັດບົດບັນທຶກກ່າວເຕືອນ, ຖ້າຍັງສືບຕໍ່ແມ່ນໃຫ້ຢຶດໃບທະບຽນ, ປິດກິດຈະການ ພ້ອມທັງມອບໃຫ້ເຈົ້າຂອງຮ້ານຖ້າມີເຫດການກໍລະນີຕິດເຊື້ອພະຍາດໂຄວິດ-19 ຕ້ອງຮັບຜິດຊອບທາງແພ່ງ ແລະ ທາງອາຍາຕໍ່ຜົນເສຍຫາຍທີ່ເກີດຂຶ້ນ ແລະ ຮຽກຮ້ອງມາຍັງພໍ່ແມ່ປະຊາຊົນທຸກຊັ້ນຄົນຈົ່ງຊ່ວຍກັນເປັນຫູເປັນຕາ

ຖ້າພົບເຫັນວ່າສະຖານທີ່ໃດຫາກມີການລະເມີດຕາມຄຳສັ່ງ, ແຈ້ງການ ແລະ ມີການຊຸມນຸມທີ່ເປັນ ຄວາມສ່ຽງໃນການແຜ່ລະບາດຂອງພະຍາດໂຄວິດ-19 ໃຫ້ແຈ້ງເຈົ້າໜ້າທີ່ບ່ອນທີ່ໃກ້ທີ່ສຸດ ຫຼື ແຈ້ງທາງເບີວອດແອັບ 02028899774 ແລະ ແຈ້ງຜ່ານທາງຊ່ອງທາງເຟສບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.

khaosan@gmail.com